Көкшетауда сүт өндіруге арналған субсидияларды ұрлағандарға сот үкімі шықты

Көкшетау қаласында мемлекеттік субсидияларды ұрлау ісі бойынша сот үкімі жарияланды. Мемлекетке келтірілген зиян 152 миллион теңгені құрады.

Екі жыл бойы «МолПродЖарқайын» ШК директоры мен «Рассвет» шаруа қожалығының басшысы сүт өндіруді арзандатуға және оны терең өңдеу өнімдерін шығаруға арналған субсидияларды заңсыз алып отырды.

«Рассвет» шаруа қожалығының сүтті жарияланған көлемде өндіру үшін қажетті мал басы болмады. Бұған қарамастан, электрондық шот-фактуралар ақпараттық жүйесінде «МолПродЖарқайын» ШК мекенжайына 3 миллионнан астам килограмм шикі сүт жеткізу туралы жалған құжаттар ресімделді. Олардың негізінде сүтті май мен қатты ірімшікке өңдеу туралы есеп беру қалыптастырылды.

Өтініштерді мақұлдағаннан кейін ақша кәсіпорынның есепшотына түсті. Мемлекетке келтірілген жалпы зиян 152 миллион теңге болды.

Алынған субсидияларды жасыру үшін ШК директоры ақшаның бір бөлігін туысының депозитіне аударды. Кейін осы ақшамен мобильді ғимарат сатып алынып, оны жалға беру арқылы табыс табу үшін пайдаланылды.

Тергеу барысында 6 жер теліміне, 4 пәтерге, 11 жеңіл көлікке, мобильді ғимаратқа және өнеркәсіптік-өндірістік құрылымға тәркілеу салынды.

Сот іс серіктерін 6 жыл 4 ай мерзімге бостандығынан айырды. Үкім заң күшіне енді.