Қытай компаниясымен келісім: Өзбекстанда 30 ұңғы қазылады

Өзбекстанның «Өзбекнефтегаз» акционерлік қоғамы Қытайдың «XIBU» компаниясымен стратегиялық келісімге қол қойды. Келісім бойынша 2026–2027 жылдары елде 30 ұңғы салынады.

Бұл құжат екі елдің ұзақ мерзімді ынтымақтастық жоспарының алғашқы кезегі болып табылады. Жоспарға сәйкес, 2026–2029 жылдар аралығында Өзбекстан аумағында барлығы 105 іздестіру-барлау және пайдалану мақсатындағы ұңғылар салу көзделген.

Келісім «Өзбекнефтегаз» АҚ Басқарма төрағасы Абдугани Сангиновтың Қытай Халық Республикасына жасаған ресми сапары аясында жасалды. Сапар барысында мұнай-газ саласының жетекші компанияларымен де келіссөздер жүргізілді.

«XIBU» компаниясы CNPC корпорациясының құрамына кіреді және әлемдегі төрт ірі мұнай-газ компаниясының бірі болып табылады. Компания бұрғылау жұмыстарын орындау үшін әрқайсысының көтергіш қуаты 450 тонна болатын 10 бұрғылау қондырғысын пайдаланады.

Жаңа ұңғылар сейсмикалық зерттеулер нәтижесінде табиғи газ қоры анықталған перспективалы учаскелерде орналастырылады. Олардың тереңдігі 5500–6000 метрден асады деп болжануда.

Қазіргі уақытта пайдаланыстағы ұңғыларда геологиялық жағдайлар өте күрделі: қысым 1000 атмосфераға дейін, ал температура 200°C-қа дейін жетеді.

Жобаны іске асыру күрделі жағдайларда бұрғылаудың қауіпсіздігін арттыру, апаттарды болдырмау, геологиялық барлау жұмыстарын кеңейту, газ қорын молайту және Өзбекстанның энергетикалық қауіпсіздігін нығайту үшін стратегиялық маңызы бар.