ОПЕК+ 1 наурызда күнделікті мұнай өндіруді 137 мың баррельге арттыруды талқылайды

Мұнай экспорттаушы елдер альянсы ОПЕК+ жақын арада күнделікті өндірісті 137 мың баррельге арттыру туралы шешім қабылдауы мүмкін. Бұл алдымен жазғы маусымға дайындықпен байланысты, онда мұнайға деген сұраныс дәстүрлі түрде өседі.

Егер шешім қабылданса, бұл үш айлық үзілістен кейінгі алғашқы өсім болады. Өндірістің ұлғаюы Сауд Арабиясы мен БАӘ-ға нарықтағы позицияларын нығайтуға көмектеседі. Сонымен бірге Ресей мен Иран батыс санкциялары жағдайында жұмыс істейді, ал Қазақстан өндірістік үзілістерден кейін көлемдерін қалпына келтіруде.

ОПЕК+ сегіз елінің – Сауд Арабиясы, Ресей, БАӘ, Қазақстан, Кувейт, Ирак, Алжир және Оманның – кездесуі 1 наурызда өтеді. Сол уақытта түпкілікті шешім қабылдануы мүмкін.

Бөлек хабарланғандай, Сауд Арабиясы АҚШ-тың Иранға соққы беру жағдайында аймақтан жеткізулердің үзілуіне дайындық жоспарын жасады. Бұрын АҚШ президенті Дональд Трамп Тегеранның ядролық бағдарламасы бойынша келісімге қол жеткізу үшін осындай нұсқаны қарастыруда екенін мәлімдеген.

ОПЕК-тен, сондай-ақ Ресей мен Сауд Арабиясының билігінен ресми түсініктемелер әзірше берілген жоқ.

Бұрын альянстың сегіз елі 2025 жылдың сәуірінен желтоқсанына дейін күнделікті өндірісті шамамен 2,9 млн баррельге арттырды – бұл әлемдік сұраныстың шамамен 3%-ын құрайды. Дегенмен одан әрі өсу 2026 жылдың қаңтарынан наурызына дейін маусымдық төмен тұтыну салдарынан тоқтатылды.

Қазіргі уақытта Brent мұнайы баррель шамамен 71 доллар бағамында саудалануда – соңғы жеті айдағы максимумнан алыс емес, ол осы апта ішінде 72,50 доллар деңгейінде болды.

Үш дереккөздің айтуынша, күнделікті өндірісті 137 мың баррельге арттыру ең ықтимал нұсқа болып көрінеді. Сонымен бірге олардың бірі альянстың үзілісті сактап қала беретінін атап өтті. Егер ұлғайту туралы шешім қабылданса, өсу көлемі өткен жылғы қазан, қараша және желтоқсан айларында бекітілген деңгеймен сәйкес келедi.