Ауыл шаруашылығы саласындағы ынтымақтастық Ташкенттегі форумда талқыланды

Ташкент қаласында «Италия – Орталық Азия (C5) + Әзірбайжан» бизнес-форумы өтті. Бұл іс-шара ауыл шаруашылығы саласындағы халықаралық ынтымақтастықты нығайту, инвестицияларды тарту және заманауи технологияларды енгізу мәселелерін талқылау үшін маңызды платформа болды.

Форумға Италияның, Орталық Азия елдерінің және Әзірбайжанның бизнес өкілдері, инвесторлары мен сарапшылары қатысты. Қазақстан делегациясын ауыл шаруашылығы вице-министрі Ермек Кенжеханұлы басқарды.

Талқылау барысында агроөнеркәсіптік кешенді дамытудың негізгі бағыттары қарастырылды. Оларға инновациялық шешімдерді енгізу, табиғи ресурстарды ұтымды пайдалану және климаттың өзгеруіне бейімделу жатады.

Халықаралық ынтымақтастықты кеңейту, тәжірибе алмасу және инвестицияларды тартуға ерекше назар аударылды. Бұл тұрақты агроэкожүйелерді дамытуға және азық-түлік қауіпсіздігін нығайтуға ықпал етеді.

Форум нәтижесінде қорытынды коммюнике қабылданды. Құжат жасалған келісімдерді бекітіп, аграрлы-азық-түлік саласындағы серіктестікті одан әрі дамыту бойынша келесі қадамдарды анықтайды.