Шетелдегі сайлау учаскелері 54 елде ашылды

Республикалық референдум аясында шетелде тұратын қазақстандықтар да дауыс беру құқығына ие. Орталық сайлау комиссиясының мәліметі бойынша, 54 мемлекетте жалпы саны 71 сайлау учаскесі жұмыс істейді.

Сонымен бірге, он елде учаскелер ашылмайды. Сыртқы істер министрлігінің орынбасары Арман Исетовтың айтуынша, бұл шешім қиын әскери-саяси жағдай мен сол елдерде тұратын қазақстандықтардың аз санына байланысты қабылданған. Учаскелер ашылмайтын елдер тізіміне Иран, Израиль, Иордания, Катар, Біріккен Араб Әмірліктері (2 учаске), Оман, Ливан, Кувейт, Украина және Эфиопия кіреді.

Шетелде тұратын және дауыс беруге құқылы болып саналатын қазақстандықтардың жалпы саны 14 380 адамды құрайды.

Дауыс беру процесі халықаралық уақыт белдеулеріне сәйкес басталды. Астана уақытымен сағат 03:00-де Токио мен Сеулдағы учаскелер алғаш ашылды. Сағат 08:00-ге қарай шетелдегі 23 учаскеден 198 адам дауысын берген еді.

Соңғы болып Сан-Францискодағы учаске жұмысын бастайды. Ол бүгін кешке Астана уақытымен сағат 19:00-де ашылып, наурыздың 16-сы таңертең сағат 08:00-ге дейін жұмыс істейді.

Қазақстанда бүгін Конституцияға өзгерістер енгізу туралы республикалық референдум өтіп жатыр. Сайлау учаскелері көбінесе таңғы сағат 07:00-ден кешкі 20:00-ге дейін (кейбір жағдайларда таңғы 06:00-ден) жұмыс істейді.

Бюллетеньде тек бір ғана сұрақ бар: «2026 жылғы 12 ақпанда БАҚ-та жарияланған Қазастан Республикасының Жаңа Конституциясын қабылдайсыз ба?» Азаматтар тек бүкіл құжатты толығымен не қолдауы, не қайтаруы мүмкін.

Референдумда сайлаушылар тізіміне енген, он сегіз жастан асатын барлық Қазақстан азаматтары дауыс бере алады.