Доллар KASE биржасында 460,37 теңгеге дейін төмендеді

7 сәуірдегі күндізгі сауда-саттық нәтижелері бойынша Қазақстан фонд биржасында (KASE) орташа салмақталған доллар бағамы 460,37 теңгені құрады. Бұл көрсеткіш алдыңғы күнмен салыстырғанда 4,88 теңгеге төмендеді.

Аталған деңгей 2024 жылдың маусымынан бері ең төменгі мән болып табылады. Сол кезде де доллар курсы 460 теңге шегінде болған еді.

Ұлттық Банк белгілеген 7 сәуірдегі ресми валюта курсы бір АҚШ доллары үшін 466,33 теңгені құрайды.

Сонымен қатар, бүгін таңертең елдегі айырбастау пункттерінде доллар бағамы 460 теңгеден төмен болды. Алматы қаласындағы айырбастау пункттерінде орташа курс: сатып алу – 461,73 теңге, сату – 464,33 теңге. Астанадағы пункттерде орташа курс: сатып алу – шамамен 456,96 теңге, сату – 463,96 теңге.

Теңгені нығайтатын негізгі фактор

Ұлттық Банк төрағасы Тимур Сүлейменовтің айтуынша, ұлттық валютаның нығаюына елдің негізгі экспорты – мұнай бағасының өсуі себеп болады. Мұнай экспортынан түскен табыс елдік валюта нарығына валюта ұсынысын арттырып отыр.

Ол сонымен қатар өткен жылғы нәтижелер бойынша теңгені дүниежүзілік масштабта тартымды валюталардың бірі ретінде сипаттады. Теңгенің тәуекел мен табыстылық арақатынасы жағынан жақсы көрсеткіштері шетелдік инвестицияларды тартуда.

Ұлттық Банк өзгермелі валюта курсы саясатын жалғастыратынын және бұл алтын-валюта резервтерін сақтауға көмектесетінін атап өтті. Базалық пайыздық мөлшерлеме өзгеріссіз – жылына 18 пайызды құрайды.